Swem

Ons neem deel aan 'n reeks mededingende aflosgala’s en vriendskaplike gala’s tydens onderskeidelik die vierde en eerste kwartaal. Die hoogtepunt van die seisoen is die interhoër in Februarie, en hierdie jaar het ons vir die eerste keer deelgeneem aan die A-Bond interhoër. Hierdie gala’s, tesame met die provinsiale kampioenskappe, bied ons swemmers die geleenthede om hul vaardighede ten toon te stel en die skool met trots te verteenwoordig.

Buiten die kompetisie beklemtoon ons die vreugde van swem as 'n lewenslange vaardigheid en ontspanningsaktiwiteit, wat leerders help om ’n liefde vir die water te ontwikkel. Swemontwikkeling is vir ons belangrik, en daarom word die swemvaardighede en waterveiligheid bevorder tydens die af-seisoen.

Ons bied ook jaarliks die Montana Guppy Gala vir omliggende laerskole aan, wat ’n baie opwindende geleentheid is.

Of ons nou vir podiumafwerkings mik of bloot persoonlike groei nastreef, ons swemprogram bied 'n inklusiewe en ondersteunende omgewing waar elke swemmer sy volle potensiaal kan bereik.

Ons is opgewonde oor die toekoms van swem en weet dat met elke huidige en toekomstige swemmer se entoesiasme, positiwiteit, deursettingsvermoë en goeie sportmangees, Monties Swem nuwe hoogtes gaan bereik.

Sluit by ons aan om golwe in die swembad te maak!

Kontak gerus vir me. Liza van Niekerk vir meer inligting by: lvanniekerk@hsmontana.co.za